Градските власти конечно ги удостоија скопјани со новогодишна елка. На три недели пред најлудата ноќ, ја монтираа врз подната фонтана, а претходно стигнаа и продажните куќички кои продаваат разни дрангулии. Плоштадот повеќе не е празен, но според граѓаните атмосферата е далеку од онаа што треба да доликува на новогодишна.
Дека главниот град заслужува повеќе и подобро сметаат и туристите кои ги затекнавме на плоштадот. Велат дека атмосферата е убава, но далеку од онаа во европските метрополи.
„Плоштадот ми се допаѓа многу. Го сакам градот, бев тука неколку пати, па уживам тука. Убаво е се подготвува за Божиќ. Елката е малку чудна, но е убаво. Ние во Норвешка имаме вистинска елка. Може треба да ви пратиме вистинска на вас“.
Градоначалничката Арсовска и годинава не сака да биде транспарентна и да каже кои фирми ги добија тендерите за разубавување на метрополата. Ниту пак има информации дали ќе има и каква ќе биде прославата на новогодишната ноќ.
„Елката е поставена на Плоштадот, но од Град Скопје не кажуваат кој украсува и колку тоа ги чини скопјани“.
Сепак во метрополата не е се така мрачно. Но, не поради градската власт, туку поради општина Аеродром која им понуди вистинска забава и еуфорија на граѓаните. До 19 јануари наредната година на паркингот на спортскиот центар ,,Јане Сандански” е стациониран „Зимзоленд“, атракција која нуди забава за сите, од најмлади до највозрасни.
Голем дел и од останатите македонски градови се веќе украсени или привршуваат со украсување и низ нивните улици и центри владее вистинска празнична магија. Големи елки, безброј сијалички, мали божиќни маркети и бројни празнични декорации ги красат плоштадите на Струмица, Струга, Кочани и други општини.
Љубиша Владимиров
