Претрес во Судскиот совет немало. МВР собира докази за фалсификувани записници со кои евентуално е сторено кривично дело. За ова влегле полицајците во Судскиот совет, а не да ги тресат канцелариите на ул. Македонија број 5. Според информации на Алфа се работи за документите со кои на колегиум бил продолжен мандатот на Весна Дамева како претседател, кој инаку требаше да и заврши на 5 декември. Полицијата има отворено предистрага и собира докази.
- „Одземено е тоа што треба да се земе, предистрага е во моментов, нема што да се каже, кога ќе заврши сѐ ќе информираме, до кога ќе трае и тоа не се знае“, велат од МВР.
Истражителите од полицијата, добиле наредба за прибирање на податоци од јавен обвинител. И Судскиот совет го потврди истото.
- „Нагласуваме дека не е издадена наредба за претрес, ниту е извршен претрес во просториите на Судскиот совет. Советот соработува и ќе продолжи да соработува со сите надлежни органи и институции во државата водејќи се од начелата на независно, одговорно и транспарентно судство и се оградува од било какви влијанија и притисоци одвнатре и однадвор, а со цел заштита на независноста и интегритетот на судството“ велат од Судскиот совет.
Сомнежите за фалсифукивање записници прв ги изнесе премиерот Христијан Мицкоски на 28 ноември кој рече и дека добива информации за проблеми во Судскиот совет. Тој спомена дека има групи кои фалсификуваат документи со различни датуми и печати, без потписи.
Но клановите во Судски за кои говореше премиерот не се нешто ново што јавноста го нема слушнато. Лани кога колегите се решија да ја симнат Дамева од претседателската функција, медиумите пишуваа за поделбите во Советот.
Членовите во судски на затворен колегиум и го продолжиле мандатот на Весна Дамева, а потоа таа самата си поднесе оставка.