Веста од Вашингтон за Груби ги испразни поставените шатори на ДУИ пред Уставниот суд. Само неколкумина верни партиски приврзаници останаа во таканаречената одбрана на албанскиот јазик што се обиде да ја продаде Ахмети. Дека вештачки создадениот балон за некаква си одбрана на интересите на Албанците е веќе пукнат се виде уште вечерта кога осамна вест за Груби.
Ова беше реакцијата на Османи и Адеми кога на своите телефони ја читаа лошата вест што им пристигна од Вашингтон, со која практично им падна во вода тезата за некакво си угнетување на Албанците. За многумина оваа драма на ДУИ очигледно беше само закана и притисок врз судиите.
Во тензично исчекување на утрешната седница, јавноста веќе виде дел од рефератот на судијата од Уставен кој утре треба да реферира. Според информациите на порталот 360, Уставен ниту ќе го укине, ниту ќе ја запре примената на Законот бидејќи е втемелен во Уставот. Конкретно според пишувањата, Уставен смета дека треба да се поведе постапка за симболите на парите и употребата на албанскиот јазик во кривичните постапки, но не и за униформите, документите од матичните книги и употребата во институциите кадешто доминира албанското население.
За дел од овие забелешки се произнесе и Венецијанската комисија во 2019-та. Професорката Татјана Каракамишева, не сака да го коментира рефератот од Уставен се додека не е официјално донесен на седница, но потсетува на забелешките на комисијата коишто се однесуваат на примената, делумно на содржината, но и на начинот на кој е донесен законот.
За поранешната судијка во Судот за човекови права во Стразбур, Маргарита Цаца Николовска, пак уште поалармантни се најавите за бојкотот на двајцата судии. Јавноста мора да ги знае аргументите за нивните одлуки.
Уставен суд треба да одлучува по 13 иницијативи поднесени од 46 експерти, професори и претставници од политички партии коишто оспоруваат 18 членови.
Во иницијативите се наведува дека Законот не бил донесен со двотретинско мнозинство и дека не бил разгледан од релевантните собраниски тела. Оспорен е и фактот што Законот е објавен без потпис на тогашниот шеф на државата, Ѓорге Иванов.
За името албански јазик во заграда, употребен е термин кој го нема во Уставот, стои во иницијативите. Спорна е и употребата во матичните книги, личните документи и пасошите, во кои не е наведена употребата на јазикот кои го зборуваат другите заедници.
Исто така, во овие иницијативи се оспорува и постоењето на Агенција за примена на јазикот, бидејќи од Агенцијата исклучени се сите заедници, освен албанската.
