Македонските граѓани да не потклекнуваат пред некои обиди за нарушување на соживотот, повикаа верските лидери во Македонија. Ова доаѓа по последните случувања со сквернавењето и палењето на македонското знаме на прославата на денот на албанското знаме, инциденти за кој постои сомнеж дека се организирани од одредени политички центри.
-Ние поглаварите на Македонската православна црвка- Охридска архиепископија, Исламската верска заедница, Католичката црвка, Евангелско методистичката црква и Еврејската заедница, ги повикуваме сите македонски граѓани да не потклекнат пред некои обиди за нарушување на соживотот, туку заедно да продолжиме да ја продлабочуваме меѓусебната солидарност и да ја запазуваме почитта едни кон други кон државните симболи на нашата татковина и кон симболите на сите етнички заедници во неа, стои во повикот кој го прочита протоѓаконот во МПЦ, Драган Иванов.
Со повикот верските лидери порачаа дека е големо богатство што сите граѓани, без разлика на нација и вера живееме во една држава.
-Живеењето во мултикултурно општество е голема благодет. Средбата на разнообразни култури носи можност за облагородѕвање на духот на човек и за зголемување на креативноста на целото општество. Бог ни дал да живеме во една, заедничка држава, стои во повикот.
На повикот за соживот се потпишаа поглаварот на МПЦ господин господин Стефан, Реисот Шаќир Фетафу, Бискупот Киро Стојанов од Католичката црвка, Марјан Димов од Евагнелистичко методистичката црвка и Пепо Леви, претседателот на Еврејската заедница. Ова доаѓа откако пред неколку дена беше сквернавено државното знаме на Македонија.
Премиерот Христија Мицкоски кажа дека вакви случувања биле очекувани, дека слични обиди ќе има и во иднина, но дека Владата жестоко ќе одговори на сите провокации и обиди за дестабилизација.
Инцидентите ги осудија сите политички партии. ВМРО-ДПМНЕ прстот го впери во СДСМ и ДУИ. Ги обвинија дека глумат загриженост, а истовремено подбуцнуваат групи да дивеат и да внесуваат раздор. Интегративците и социјалдемократите со спротивставени ставови – ДУИ тврди дека полицијата ги испровоцирала хулиганите да го запалат знамето зошто неоправдано интервенирала, а СДСМ тврди дека МВР не направило доволно. Коалицијата ВРЕДИ порача граѓаните да не дозволат да бидат инструментализирани од оние кои по губењето на власта го изгубиле и сопствениот пат.
Матеја Петровски
