Десет спонтани абортуси и уште исто толку ин-витро обиди, не ја скршија волјата на 61-но годишна Скопјанка, која вчера, стана највозрасната родилка во Македонија. Таа роди здраво машко бебе. Малиот Петар тежи 2 килограми и 350 грама, а породувањето беше извршено на скопска Гинекологија. Директорката Ирена Алексиоска-Папестиев, порача, дека за медицината повеќе не постојат граници, а случајот со 61-но годишната родлика е доказ за тоа.
„Во светот на медицината не постојат повеќе граници и дека медицината во Македонија може да се мери со онаа во светот. Добила ин-витро третман во нашата држава, цела бременост и била следена во нашата држава и раѓањето е завршено на универзитетската клиника за гинекологија и акушерство“, изјави директорката на скопска гинекологија, Ирена Алексиоска Папестиев.
61 годишната мајка имала замрзната јајце клетка, а во текот на бременоста, која била контролирана ѝ се појавил висок притисок и шеќер, но, сè поминало во најдобар ред.
„Денеска и мајката и бебето во добра општа состојба, одлична општа состојба, ги испративме дома, нејзиниот сопруг е 65 годишен, само што отишол во пензија и кажа нема проблем кој да го чува детето“, изјави Алексиоска.
Жената херој, како што ја нарече директорката на ГАК, бил породена со царски рез во 36-тата недела од бременоста. Таа претходно, имала богато минато со гинеколошко – акушерски зафати. Врз неа биле извршени три интервенции, од кои две, во Белград.
Љубиша Владимиров
