Секна горивото на ЈСП. Иако од Град Скопје доцна синоќа во соопштение најавија редовни линии, и денес автобус се чека со часови, а на постојките се забележува како голем број на граѓани нервозно чекаат навреме да стигнат до планираната дестинација. Директорот на ЈСП Драги Кушовски не одговара на повиците, а високи извори од ЈСП за АЛФА брифираат дека автобусите за викендот доцнеле поради недостиг на гориво, а денес сообраќаат само половично.
На автобуските постојки владее метеж, граѓаните измрзнати и револтирани. Голем дел од нив кои имаат извадено месечени билети за 1800 денари се принудени да користат такси услуги, доцнењето на работа или факултет им станува секојдневие.
“Со саати чекаме автобус, секој ден” нервозно одговори граѓанка
“Чекаме автобуси ама на 40 минути доаѓаат. Саботата навечер немаше автобус, вчера пак немаше автобус, цели два часа чекавме” изјави граѓанка
“Каснат, со 70-ка патувам, измрзнав додека го чекам, измрзнав” бурно одговори граѓанка
“Автобуси чекаме и по 30/40 минути и не доаѓаат. Превозот е катастрофа ништо не функционира како што треба, се случува да влегуваме во други автобуси за да стигнеме на работа” изјави граѓанин
“Секој ден чекаме исто, 40 минути, саат, некогаш и саат ипол за автобуси до Центар, Драчево, Аеродром, катастрофа е” изјави граѓанка.
Само во последните две години ЈСП има добиено субвенции во висина од околу 23 милиони евра со кои требаше да се надминат проблемите, автобусите редовно да сообраќаат, вработените навремено да добиваат плата, што впрочем беше и ветено од Град Скопје. Но за жал сликата остана непроменета. Вработените во неколку наврати штрајкуваа поради доцнење на плати, автобуси редовно нема.
Инаку, Официјален став за настанатиот хаос побаравме и од Град Скопје, но вообичаено оттаму не добивме одговор, а со самото тоа останува и неодговорено до кога граѓаните ќе бидат приморени измрзнати со часови да чекаат на постојките.
Даниел Ѓорѓевски
