Автопати, водоводи, канализации… ова се само дел од капиталните инвестиции кои ќе ги реализира Bладата.
-Ние сме фокусирани на вистински капитални инвестиции. Тоа го гледате и во општините и на терен, скоро бевме тука како би ја отпочнале реализацијата за Коридорот 10д, кој автопатски ќе ги поврзе Прилеп и Битола. На почетокот имавме дилема кој пат да го фатиме. Првиот пат беше да излеземе од тој проект, а со тоа македонските граѓани да плаќаат стотици илјади евра пенали поради катастрофалниот договор на претходната влада. Или второто беше да работиме и да го забрзаме процесот и што побрзо да се реализира. Ние одлучивме второто да го направиме, бидејќи сакаме да имаме автопати, тие се дел од нашата програма и бевме свесни дека мора два пати повеќе да работиме за да можеме да ја стигнеме динамиката, да го надоместиме тоа кое беше испуштено до претходната влада.
Ова го истакна претседателот на Владата на Република Македонија, Христијан Мицкоски по денешната посета на Тутунски комбинат АД Прилеп, во одговор на новинарско прашање, во однос на капиталните инвестиции.
-Сега веќе се работи на две секции од четирите, третата се подготвува, за четвртата Требениште-Ќафасан имаме проблеми, бидејќи дел од делницата е во периметар кој е заштитен од УНЕСКО, дел е во приватни парцели, работиме и на тоа. Не работиме двапати побрзи чекори, направивме 4 пати побрзи чекори. На потегот од Прилеп до Битола од 1200, 1300 парцели- 850 веќе се решени, очекувам и другите. Армијата работи на деминирање, така што сите капитални инвестиции се реализираат и за следната година во буџетот се предвидени околу 50,5 милијарди денари.
Мицкоски подвлече дека за разлика од претходно, сега има вистински реални капитални инвестиции и обзнани еден податок.
-До 24 јуни буџетскиот дефицит и реализираните капиталн иинвестиции беа 3:1, 18 милијарди на 6 милијарди, заклучно со октомври буџетскиот дефицит е под 24 милијарди, а капиталните инвестиции се околу 19 милијарди. До крајот на годината би требало да се спојат.
