Случувањата во Украина и на блискиот исток ќе бидат главни теми на денешниот петти самит на Европската политичка заедница во Будимпешта, на кој ќе учествува и премиерот Христијан Мицкоски.
Станува збор за собир на кој ќе присуствуваат десетина европски лидери на кој ќе се дискутираат прашања од значење за европските но и меѓународни случувања. Премиерот Мицкоски вчера изјави дека нема договорено средба со бугарскиот претседател Румен Радев на маргините на самитот, но како што кажа, подготвен е да разговара со секого и секаде.
„Подготвен сум да разговарам со секого, секаде врз основа на вистински договор што ќе не однесе до целта, е на да го направиме само првиот чекор, рече Мицкоски.
Домаќин на самитот е унгарскиот премиер Виктор Орбан, кој неодамна изрази подготвеност да посредува помеѓу Скопје и Софија за надминување на бугарската блокада на преговарачкиот процес на Македонија за членство во Европската Унија.
