Ќе паѓаат уште глави од картелот од Грчец и нивни соработници. Голем број пораки и материјал од комуникацијата на енкриптираната апликација „Скај“ ќе ги открива сите кои се вмешани во бизнисот на подземјето. Панче Тошковски, министерот за внатрешни работи вели дека истрагата може да открие организиран криминал и висока корупција, по примерот на двајцата пензионирани инспекториза имотни деликти кои им откривале службени тајни и ја алармирале групата „Дуќанџик“ за акциите и апсењата кои ги планира полицијата скоро година ипол.
- „Во иднина ќе има доста интересни случаи за јавноста а поврзани со организиран криминал и висока корупција. Претпоставувам дека во иднина ќе следат поголем број на случаи коишто се поврзани со доказниот материјал обезбеден од страна на Скај апликацијата“, вели Тошковски.
Останува можноста и други полицајци да се вмешани во протекувањето на службени тајни од МВР. Двајцата инспектори кои работеле за групата од подземјето, успеале да заташкаат дури пет претмети меѓу кои и акцијата „Планина“ во која главните од групата Дуќанџик од Грчец заедно со шефот им избегаа на органите на прогонот. Протекувале детали и од истрагите за убиства од 2020 и 2021 година, а се служеле и со закани – жртвите да менуваат искази пред инспекторите.
За одадените тајни, полицајците биле дебело наградувани со станови, коли и кеш кои не можат да се дозволат со плата на полицаец. Уапсените кои паднаа сега но и во претходната акција на полицијата, комуницирале на енкриптираната „SKY/ECC“ апликација преку која паѓале договори за набавка и пренесување на кокаин од Јужна Америка преку Европската Унија до Македонија.
Додека мрежата на Муареми се отплеткува, тој засeга е само осомничен, бидејќи е во бегство и се наоѓа во Дубаи. Во јули годинава беше поднесено обвининие за петмина од групата Дуќанџик од Грчец кои се товарат за шверц и продажба на кокоаин.
