Зоолошката градина останува во целосен карантин. Ниту птица може да прелета, ниту има некаква информација што се случува внатре, зад затворените капии или пак, каква е состојбата со животните. Изминаа веќе две недели откако надлежните и ставија клуч на врата, како нулта точка од каде можеше да избие епидемија на птичји грип, а се уште нема никакви информаци дали заразата е искоренета или можеби некоја друга птица добила позитивен резултат за опасниот H5N1. Директорот Зоран Попов, како и зоолошката, бил на боледување, а портпаролката само кусо ни кажа дека со животните било се во ред.
„Вратите на Зоолошката градина и денеска се затворени за посетители. Тоа ќе биде така и во наредните денови односно уште осум дена, до кога е рокот во кој што надлежните треба да расчистат со случајот“.
Угината слоница, жирафа, монголски коњи, лемури, антилопи, зоолошката градина е целонсо уништена. Од најразвиената и најпосетената во регионот до руинирана и со клуч на врата, една од најстарите зоолошки во Европа ги преживува најтешките години од своето речиси 100 годишно постоење.
Граѓаните сметаат дека не се води доволно грижа за животните во Зоолошката и бараат одговорност. Од Агенцијата за храна и ветеринарство велат дека засега остануваат на сила и изречените заштитни и контролни мерки.
„Мерките ќе бидат на сила 21 ден и истите се однесуваат на забрана за влез и излез на посетители во зооолошката градина, спроведување на мерки за дезинфекција и чистење на одгледувалиштето,забрана за влез и излез на други птици или цицачи без одобрение на официјален ветеринар, лабораториско тестирање на примероци од секоја сомнителна или угината живина, одржување на саеми изложби и други собири на живина или други видови птици на територијата на Град Скопје“, велат од Агенцијата за храна и ветеринарство.
На 19 октомври беше извршено хумано убивање на 24 патки, 6 гуски, 5 кокошки и една чавка, откако беше потврдено присуство на птичји грип. Од страна на надлежен официјален ветеринар беше спроведен надзор и беа превземени мерки за следење на болеста. Од Институтот за Јавно здравје велат дека нема заразени луѓе со птичји грип. Досега беа тестирани само двјаца луѓе, едниот вработен во зоолошката, а втората била посетителка која сама барала да се тестира. И двата резултати се негативни.
Љубиша Владимиров
