Нови 100-тина вработувања, преку странска инвестиција вредна околу 8,5 милиони евра. Договорот за новата инвестиција е веќе готова работа, соопшти премиерот Христијан Мицкоски. Станува збор за компанијата Брејн-чајлд, која своите капацитети за производство на опрема за спортови на вода и ветер ќе ги отвори во индустриската зона во Битола.
-Имаме една нова инвестиција која што е веќе завршена и уште неколку кои што се во процес на завршување. Очекувам до крајот на годината и тие да ги завршиме. Ова е инвестиција на компанијата брејн чајлд вредноста е некаде околу осум и пол милиони евра. И очекувам таа да вработи околу 100-тина луѓе, изјави Мицкоски.
Тие веќе го купиле земјиштето и почнуваат со изградба на своите производствени капацитети. Премиерот најави дека да крајот на годинава во Македонија може да се очекува промоција и на други странски инвестиции.
-Веќе ја закупија парцелата во зоната Жабени, почнуваат да ја градат првата хала од 3.000 метри квадратни. Така да, во периодот кој што следи ќе бидеме сведоци на уште нови и успешни вести и очекувам бројот на странски инвестиции драматично да се зголеми до крајот на годината, изјави Мицкоски.
Една од главните цели на Владата е привкелување на нови инвестиции во државава, со цел отворање на нови повисокоплатени работни места и зголемување на животниот стандард во Македонија.
Ова е само една од серијата инвестиции во изминативе, нешто повеќе од три месеци. Претходно беше објавено дека во Македонија влегуваат Алказар Енерџи преку градење на ветерен парк, германско белгиската компанија Епсотех Аим, американскиот Вабтек, како и германската БМЗ, за производство на литиумски батерии.
Матеја Петровски