Ќе растат платите и во јавното здравство – најави министерката за финансии Димитриевска Кочоска. Таа вели дека, додека се крои државната каса за 2025 година ќе се преговара со засегнатите страни во здравството да се обезбедат пари за медицинско – техничкиот персонал. Министерката стои зад најавите за зголемување на платите во државното здравство, но деталите ќе се знаат по изготвувањето на буџетот.
“Очекуваме сега и во здравството да видиме, особено за медицинско-техничкиот персонал. Докторите ги исклучувам овде, бидејќи во минатото имаа повеќе покачување. Не велам дека, можеби, нема да бидат опфатени, но фокусот ни е повеќе на техничките служби, медицинските сестри” – рече Димитриеска-Кочоска.
Повисоки плати ќе добијат и наставниците во основно и средно образование, тие веќе идниот месец ќе ја земат октомвриската плата поголема за 5%. Но ова е само почеток, велат од Владата. Ново покачување во образованието е предвидено и во март следната година, а платите ќе растат секоја година.
Според проценките на премиерот Мицкоски, предвидено е во следните четири години основната плата на наставниците да се зголеми за минимум 46 проценти или да достигне околу 50 илјади денари.
Динамиката на зголемување на платите ќе зависи од тоа колку пари ќе се приберат во Буџетот, па процентот 46 како што кажа премиерот Мицкоски е мимумот што го очекуваат. Парите како што кажа премиерот се обезбедени со домаќинско работење и зголемена наплата на давачките во Буџетот.
Синдикатите го поздравија овој чекор, велат е напредок во социјалниот дијалот . Очекуваат до февруари да се потпише колективниот договор.
