Двесте и педесет евра за електронски уреди за секој студент и 10 милиони евра за развој на бизнисот за млади. Секој млад човек од 18 до 29 години ќе може да аплицира со проект и ќе добие од 1000 до 30.000 евра за да почне свој бизнис.
Владата преку мерки ќе ги поддржува младите кои се моторот на општеството и иднината на Македонија. Премиерот Христијан Мицкоски, на 33 годишната конференција на Унијата на млади сили на ВМРО-ДПМНЕ порача дека вложувањето во образованието и во младите е клучот за развој на едно општество.
„Владата ќе потроши со новиот буџет кој што е во изработка ваучери од 250 евра за електронски уреди за сите студенти во Македонија. Владата ќе обезбеди фонд од 10 милиони евра за развој на бизнисот за млади од 18 до 29 години со новиот Буџет“, рече претседателот на владата на Македонија Христијан Мицкоски.
Парите за сопствен бизнис ќе се доделуваат во зависност од бизнис планот, а за тоа како и дали истите ќе завршат на вистинско место под строги критериуми ќе оценува комисија која ќе биде формирана и ќе има претставници од повеќе институции. Мицкоски им порача на младите дека повеќе нема простор за изговори и дека Македонија мора да успее.
„ Македонија без вас нема да постои запомнете го тоа. Ние сме тука за вас и се што треба ќе направиме да останете тука и да ја продолжите приказната за Македонија. Да ѝ го продолжите животот. Затоа што јас знам дека, таа не се само дрвата, планините, езерата, реките и културните знаменитости. Таа се нејзините луѓе и без луѓе за бадијала е се. Затоа тука сме и оваа е само почеток. Нема веќе време за изговори и за плукање на минатото“, рече Мицкоски.
Мицкоски им вети на младите поинаков свет, од овој кој сега го живеат. Вети дека ќе ја направи Македонија онаква за каква што мечтаеле голем број генерации пред нив и дека сега е дојдено времето за промени и создавање на општество во кое тие ќе просперираат. Мицкоски им се обрати и на скептиците, за кои рече дека секогаш имале нешто да кажат, дека Македонија ќе успее токму заради младите, без разлика на нивната етничка, верска и политичка припадност.
Љубиша Владимиров
