Комисијата за надворешна политика на Бугарското собрание ја усвои декларацијата за односите со Македонија, предложена од крајнодесничарската партија „Преродба“, на Костадин Костадинов, со која, во кратки црти се критикува одговорот на македонските власти на најновите провокации од Софија.
Повод за декларацијата, се, цитирам, „низата антибугарски изјави на водечките политичари во Македонија, кои имаат за цел да ги минираат билатералните односи и да ја претстават Бугарија во лошо светло пред европските партнери“, како и, повторно цитат, „одбивањето на Македонија да ги исполни условите предвидени во преговарачката рамка, што ќе и овозможи на земјата да започне вистински процес на преговори за европска интеграција“.
Иако имаше несогласувања меѓу партиите застапени во парламентот, тие сепак најдоа консензус и се обединија околу текстот на декларацијата, која со мали амандмански корекции е едногласно усвоена во комисијата. Претседателот на Комисијата за надворешна политика и лидер на ГЕРБ Бојко Борисов, најави дека декларацијата во текот на денот ќе биде усвоена и на пленарна седница.
