Данела Арсовска да престане да им се меша во работата на директорите на јавните претпријатија и да престане да ги менува секој месец. Во спротивно Скопје ќе продолжи да се дави во смет и депонии и градот ќе биде нефункционален – вели за Алфа поранешниот долгогодишен оперативен директор во „Комунална хигиена“, Лазе Ѓорѓиевски, според кој проблемот лежи во градоначалничката и нејзиното менаџирање на градот и претпријатијата.
Тој вели дека Арсовска не им остава доволно простор и време на директорите да си ја вршат работата и да ги завршат сите оперативните планови и програми со кои дошле на функцијата.
„Тоа што Арсовска Данела поставува директори, меѓутоа не треба да им се меша во работењето на претпријатието. Претпријатието си има оперативен план и програма и си работи по оперативне план и програма… Даниела треба да даде, не месец, два, три па мењај. Остави простор, затоа што секој нов директор внатре има професионалци. Јас оставив добри раководители уште кога отидов во пензија пред три години, што ја знаат работата“, вели Лазе Ѓорѓиевски поранешен долгогодишен оперативен директор во претпријатието „Комунална Хигиена“.
Според Ѓорѓиевски за надминување на состојбите, Арсовска треба на раководните места да назначи професионалци, а советниците во градот да ја гласаат програмата за работа, но најважно од сѐ е да се воведе комунална полиција и да се почитува комуналниот ред.
„Спасот е многу едноставен. На наредна седница да се формира комунална полиција, како во Белград. Мора. Коце 80 редари донесе во негово време, меѓутоа ги нема луѓето. Ние имаме еко-патрола во комунална која работи само на составување на записник и тоа едукативно“, вели Лазе Ѓорѓиевски поранешен долгогодишен оперативен директор во претпријатието „Комунална Хигиена“.
Арсовска досега смени околу 50 директори, а најновиот во „Комунална хигиена“ Јетон Незири наместо да почне да го решава проблемот со ѓубрето и истото навреме го собира од улиците низ Скопје, тој за расфрланиот отпад ги обвини граѓаните.
Незири, тврди дека работеле баш како што треба, а за страшниот изглед на градот што од ден во ден станува се поголем извор на зараза, не ја гледа вината кај себе и градоначалничката, туку за „Алфа“ ни одговори дека граѓаните биле виновни што Скопје изгледа како огромна депонија.
Инаку Ѓорѓиевски не се согласува со предлогот јавните претпријатија да се трансформираат и дел од ингеренциите за чистењето на градот да ги преземат градоначалниците на скопските општини. Според него овие промени нема да донесат ништо ново и на тој начин нема да се решат проблемите на Скопјани. Само ќе резултира со масовни отпуштања и 1300 вработени во „Комунална хигиена“ ќе останат на улица, тврди нашиот соговорник.
Љубиша Владимиров
