Македонија последниве години не искористила стотици милиони европски пари од ИПА фондови за капитални проекти, обелодени министерот за европски прашања Орхан Муртезини. Бројни проекти за кои имало пари на располагање останале нереализирани поради неспособноста или неажурноста на претходната Влада која не изменаџирала безмалку ништо на овој план. Со усвојувањето на реформската агенда Македонија има шанса да икористи нови 750 милиони евра за сите сфери во општеството. Само за тековната 2024-има уште 43 милиони евра кои што не се искористени, а со нив може да се изградат капитални објекти.
Еден од проблемите зошто Македонија зема позајмици, а не ја користи можноста да црпи од европските фондови е дефицитот на стручниот кадар во ИПА структурата. Министерот најави решение за овој проблем со тоа што министерствата и општините ќе вработуваат лица кои ќе прават евалуација и имлементација на проекти со пари од ЕУ. Во речиси сите извештаи на ЕУ болна точка е преоптоварената администрација, но министерот Муртезани вели дека новите кадри нема да ја оптоварат администарцијата туку ќе успеат да ги имплементираат проектите и да ги потрошат европските пари.
Според последните анализи, дел од овие средства остануваат неискористени, поради неиформираност за можноста за користење, недостаток на добри проекти, како и комплицираната форма за аплицирање. Познавачите на приликите сметаат дека институциите не се подготвени и не ги знаат постапките околу аплицирање во ИПА програмата. Во овој процес треба да се вклучат и универзитетите во земјава, каде има кадри кои знаат како максимално да ги искористат средствата од европските фондови.
