Преку намалување на даноците до повеќе инвестиции, подобра економија, поголеми плати за работниците. Владата има сериозен план за да се обезбеди поволна деловна клима но и услови за забразан и одржлив раст на економијата. Премиерот Христијан Мицкоски најави дека новата власт се стреми кон намалување на даноците, односно во прв план е намалување на данокот на добивка од 10 на пет проценти, но прво ќе треба да се види приходот во буџетот годинива, а потоа да се оди кон оваа реформа.
-Прв чекор кон намалување на даноците ќе биде оној данок на добивка кој што се плаќа сега, и сите мултинационални компании кои што планираат својата добивка да ја консолидираат овде кај нас, а таа добивка изнесува 50 милиони евра плус, ќе добијат би рекол субвенција и начинот на пресметка на таа добивка ќе биде до пет проценти, до сега беше до 10 проценти фиксна, во овој случај ќе биде до пет проценти, изјави Мицкоски.
Помошта на домашните компании е една од главните цели на македонската Влада. Поради тоа секојдневно постои комуникација со бизнис секторот и стопанските комори. Мицкоски вели дека примарен приоритет е македонските компании да растат, бидејќи тоа ќе придонесе на раст и на сите други полиња.
-Колку побрзо тие ќе растат и колку поробусно тие ќе растат, толку повеќе ќе има приходи и во самиот буџет, колку повеќе ќе има приходи во самиот буџет, толку повеќе ќе има инвестиции во образованието, здравството, повисоки пензии, повисоки плати, во земјоделието, во културата, во спортот, инфраструктурата итн итн. Како Влада се насочивме жестоко да работиме заедно со македонската економија, со компаниите, изјави Мицкоски.
Првиот човек на Стопанската комора на Северозападна Македонија, Менди Ќира изрази благодарност за оваа средба на која што се разговарало за важни теми за бизнисите во државава, како што е најавената помош од 250 милиони евра за македонските компании. Вели кај бизнис секторот постои радост што во првиот месец од владеењето на новата власт стопанството е еден од главните приоретети.
Матеја Петровски
