Недопирливите ќе станат достапни, а полицијата нема да брка „вештерки“ туку ќе ги процесуира предметите за сите што се огрешиле пред законот. Министерот Панче Тошковски најавува засилено темпо во борбата со криминалот.
Поради засилената борба со корупцијата, министерот вели дека очекува жестоки напади за него, напади кои веќе почнаа да се случуваат.
Тошковски вели дека СДСМ фабрикува афера за него и за генералниот секретар на Владата, Игор Јанушев, токму кога властите започнале да расчистуваат со криминалите на ДУИ односно по поднесената кривична пријава за Дрин Ахмети.
Според министерот, СДСМ со ваквите обвинувања излегува заштитник и како што вели покровител на криминалите коишто ДУИ ги има сторено во минатото.
Од СДСМ пак продолжуваат со обвинувањата. Тврдат дека изјавата на министерот била несериозна.
Тошковски треба да одговори на јавноста која е неговата улога во целиот случај. Дали Тошковски и Јанушев се јавуваат и како соинвеститори за заедничка изградба на зградата во центарот на Скопје?, велат од СДСМ.
Опозицијата обвини дека министерот за внатрешни има стан во центарот на Скопје во иста зграда во која генералниот секретар на Владата Игор Јанушев добил на подарок имот од 325 илјади евра.
Јанушев веќе објасни дека станувало збор за подарок од неговите родители кој и претходно бил пријавен и каде нема ништо спорно.
И едниот и другиот ги повикаа институциите да го испитаат случајот и, како што велат, да потврдат дека се било чисто. Антикроупциската комисија веќе оформи предмет.
