Само формирање на земјоделски задруги, може да ги спаси земјоделците од целосен колапс, порача денеска од Свети Николе, претседателот на Мрежата на земјоделски задруги. Здружувајќи се заедно , фармерите полесно ќе ги пребродат инфлаторните шокови, пазарните нарушувања од геостратешка природа, но и климатските промени кои им се закануваат. .
„Земјоделието, посебно во Македонија е доведено во колапс. Во овој момент земјоделието решава прашање од егзистенционален карактер. Едноставно фармерите, не можат да ги покријат основните трошоци или да овозможат проста репродукција„ изјави Ѓорги Арнаудов, претседател на Мрежата на земјоделци.
Нашата држава воопшто не ги следи европските трендови. Ако таму еден земјоделец е член на најмалку три задруги, кај нас од седумдесетина регистрирани, едвај функционираат педесетина задруги. Позитивен пример се задругите од штипското село Црешка и од Преспанскиот регион. Вмрежени заедно, успеваат полесно да ги пласират своите производи.
„Ако се здружат земјоделците во задруга имат поголема шанса за напредок. Јаболкото само да се произведува и продава е по ниска цена,но ако се здружат и изработуват краен производ, тогаш може да биде за сите многу подобро и да има поголем приход„ изјави Рахела Трнталовска од земјоделска задруга од Преспанскиот регион.
„Во екот на сезоната или во медоберот, тогаш еден пчелар не може да работи сам. Тогаш сес здружуваме во задругата за да можеме меѓусебе да си помагаме. Има одредени луѓе на кои повеќе им оди траговија. Па така сите заедно успеваме да го продадеме целиот мед и да не ни остане мед за наредната година„ изјави Митко Николов од земјоделска задруга во село Црешка, Штип
На денот за подигање на свеста на земјоделците во здружување во задруги, од Мрежата до новиот министер упатија апел за нови законски решенија, како и поголема финансиска поддршка, бидејќи досегашната не била редовна и опфаќала мал број на задруги.
Александра Ристевска
