Затрупан возач од наноси песок на автопат, повреден турист во Охрид, паднати дрвја, поплавени куќи, подрумски простории и гаражи, проблеми во снабдувањето со електричната енергија, оштетени покриви, скршени стакла, откачени лимови и олуци од куќи и згради. Ваков пустош остави последното невреме. Рекордни безмалку 2800 пријавени случаи во Центарот за управување со кризи.
„Имаше две спасувачки акции кој што завршија успешно, една е во охридско за спасување на повреден странски турист, кај хотелот „Десарет“ и едната е за заглавен камион на автопат, буквално гранки паднати и дрвја од силното невреме кои што направиле и бариера од наноси песок каде што заглавил камионот. Но, за среќа возачот иако заглавен, чекаше во камионот, a доцна синоќа го извлекоа камионот, после 22:00 часот“, рече Илија Бојаровски, портпарол на ЦУК.
Од ЦУК велат дека според прописите прво ќе се направи записник, а потоа следи проценка на штетата од надлежните институции, за да можат граѓаните да бидат обештетени.
Имаше оштетени патнички моторни возила, паднати огради и блокирани улици. Од ЦУК велат дека најпогодени делови биле Скопскиот регион, кумановскиот, кривипаланечкиот, велешкиот, кавадаречкиот, а големо невреме го погоди и источниот дел на Пелагонија и Мариово.
Во Скопје најмногу пријави стигнале од Ѓорче Петров, Бутел, општина Шуто Оризари и Гази Баба.
„Ѓорче Петров, Бутел, општина Шуто Оризари, Гази Баба. Тоа беа најпогодени, но секако вие знаете дека имаше и јадра од невремето, што беа појаки и проследени со град“, рече Бојаровски.
Во Карпош улиците станаа реки, водата наместо да тече низ атмосферска канализација, ги поплави улиците. Во населбата „Даме Груев“, невремето искрши гранки и откорна кабли за струја. Волково беше исто така едно од најпогодените места, а ветерот дувал и до 100 километри на час.
Жителите претрпеа големи штети… прокиснати тавани, откронати дрвја, искршени фотоволтаици, уништени покриви. Жителите велат дека ветерот дувал и над 100 километри на час.
До ЦУК бил пријавен и случај на падната карпа на булеварот „Никола Карев“ во три часот и триесет минути, по влезот на касарната Илинден во Скопје, а службите веднаш излегле на терен и ја отстраниле. За среќа немало повредени и жртви.
„Да но нема повредени, тоа е на улицата на влезот после касарната Илинден, во три часот и триесет минути, од центарот за управување со кризи веднаш беа известени. Прва на терен излезе сообраќјната полиција да го регулира сообраќјот да ја обезбеди карпата, а потоа службите кој што се надлежни за патиштата излегоа да го расчистат теретнот“, рече Бојаровски, портпарол на ЦУК
Од центарот за итни случаи велат дека нема информации за други повредени и смртни случаи. Од УХМР и за денес најавија силни врнежи од дожд, град и молњи. За време на викендот се очекува да има смирување на метеоролошката состојба, а од понеделник повторно не очекува силен бран на невреме.
Љубиша Владимиров
