Како се трошеле народните пари и парите од ЕУ фондовите за патната и железничката инфраструктура во земјава, веќе се на проверка во рацете на обвинител од Основното јавно обвинителство, потврдуваат оттаму за Алфа. Како и секој извештај на Државниот завод за ревизија, така и последниот, веќе е доставен до Обвинителството, а оттаму веќе го распоредиле.
Извештајот на ДЗР за реализација на капиталните инвестиции финансирани преку буџетот на РСМ, ЕУ фондовите и средства од други меѓународни финансиски институции во надлежност на централната власт и локалната самоуправа е доставен до Јавното обвинителство. Во Основното јавно обвинителство Скопје е оформен предмет и е распореден кај надлежен јавен обвинител кој веќе презема дејствија на проверки, велат од Јавното обвинителство.
Министерот за транспорт и врски Александар Николоси обелодени дека според извештајот на ревизорите Македонија ќе ја гради најскапата пруга на светот која треба да ја сруши Крива Паланка и да заврши во тунел без излез.
Вредноста на пругата кон Бугарија е зголемена за 220 милиони евра и сега изнесува 560 милиони евра наместо првично планираните 340. Како што посочи Николоски на вчерашната пресконференција тендерската постапка е почната во предизборието во крајно нетранспарентен процес.
Но, не е само пругата кон соседна Бугарија. Според Николоски извештајот отвора и сомнеж за досегашното работење на претпријатието за државни патишта. Неизградениот пат Дреново-Градско, според министерот е проект кој има ризици од арбитража. Исто така министерот бара Обвинителство да ја провери зголемената вредност од 175 милиони евра за автопатот Кичево-Охрид, за кој веќе се потрошени 446 милиони евра, а се уште не е изграден.
Тој јавно го повика Обвинителстото да постапи, во спротивно самиот ќе иницира средба.
Николоски очекувал директорите на двете претпријатија Државни патишта и Железници инфраструктура досега да депонираат оставка поради според него кардиналниот неуспех на нивното директорување. Засега не се знае кој ќе ги замени овие директори бидејќи владејачката коалиција се уште нема донесено таква одлука.
