Меѓународниот филмски фестивал „Преку езерото“ од 31 јули годинава по трет пат ќе се одржи на брегот на Дојранското езеро. Со проекции на пет долгометражни филмови од кои 4 играни и еден долгометражен документарен филм фестивалот кој е единствен од ваков тип во Македонија ќе понуди одлична програма за сечиј вкус.
„Многу ни е важно да опстоиме на тој концепт затоа што ние кои што живееме на границата помеѓу истокот и западот, помеѓу Медитеранот и Европа, навистина имаме ретка можност да бидеме мост преку кои културите на истокот на Медитеранот и културите на западот на Европа ќе се спојат во едно“, изјави Јани Бојаџи филмски режисер и директор на фестивалот „Преку езерото“.
Со цел развој на македонската филмска и телевизиска индустрија преку поддршка на млади автори и филмски творци, годинава е распишан и конкурс за дипломски филм на кој ќе можат да аплицираат студенти од факултетот за драмски уметности и Универзитетот Еуропа Прима Скопје. Предност ќе имаат младите од источниот дел од земјата.
„Она што како новина, оваа година фестивалот „Преку езерото“ го предвидува, а се во интерес и со цел и развој на македонската филмска и телевизиска продукција, преку поддршка на млади автори е распишување на конкурс, кој што ќе се однесува за дипломски филм“, рече Мими Ѓорѓовска – претседател на советот на фестивалот „Преку езерото“.
„Конкурсот започнува од понеделник и ќе трае до 15 јули. Сите апликации ќе бидат разгледани, ќе се направи селекција и селектираните апликанти ќе дојдат на еден вид избор на самиот фестивал. Идејата е на тие студенти и млади автори да им овозможиме да бидат дел од фестивалска атмосфера да запознаат сериозни луѓе, да можат да разменат искуства“, рече Јани Бојаџи.
Иницијативата замислена од филмскиот режисер и продуцент, Јани Бојаџи веќе прераснува во етаблиран фестивал на балкански и медитерански филм, во кој се разработуваат теми кои го карактеризираат духот на медитеранот, културата, уметноста и традицијата на медитеранските земји.
