Пржинската влада заминува во историјата. Новото мнозинство најјави дека во пакетот закони коишто ќе бидат доставени во Собранието ќе биде и законот за укинување на техничката влада.
- „Планираме неколку законски решенија или како пратеничка група или како коалиција да ги поднесеме во рамките на парламентот. Еден е и тој. Зборуваме за техничката влада. Ние пред изборите имавме јасен став. Прецизен став, дека нема потреба од техничка влада. За жал тогаш не наидовме на поддршка од тогашното владино мнозинство.“ – Изјави Христијан Мицкоски, лидер на ВМРО ДПМНЕ
Пржинската влада досега создаде повеќе проблеми. Освен проблемот кој се појави со двете фотелји на кои седи техничкиот премиер Талат Џафери, техничката влада создава проблеми и во предизборниот процес.
Последно, владата на седница му поништи пет одлуки на техничкиот министер за внатрешни Панче Тошковски, па настана хаос. Аналитачарите го делат ставот дека овој вид на влада прави повеќе хаос отколку што ја ислолнува улогата на Влада за организирање на фер и демократски избори.
Во меѓувреме, Собранието преку соопштение информираше дека Талат ќе биде и премиер и пратеник се додека не се избере нова влада.
- Имено, кога не станува збор за оставка на претседателот на Владата, односно на Владата, кога и е изгласана недоверба на Владата или кога е распуштено Собранието, во Уставот, Законот за пратениците, Законот за Собранието и Изборниот законик, не постои одредба која што го уредува прашањето за функционирањето и престанокот на мандатот на Владата, во периодот по конституирањето на Собранието до изборот на нова Влада. – Соопштија од Собрание.
И самиот Џафери од собраниската говорница најави дека и понатаму ќе остане на премиерската фотелја се до изборот на нов претседател на Владата, а дотогаш нема да учествува во работата на Собранието.
Претходно од Антикорупциската комисија повикаа техничкиот премиер Талат Џафери и дел од министрите кои станаа пратеници да си поднесат оставки. Првата антикорупционерка Татјана Димитровска изјави дека двете функции на Џафери се неспоиви и согласно законот за спрелување на корупција, Џафери и министрите им е запретена казна од 300 до 500 евра.
Имено, во март минатата поранешниот премиер Ковачевски тврдеше дека пржинска влада не е потребна бидејќи е договорена во период кога Македонија била заробена земја, но сепак не направи ништо за нејзино укинување. Дури,
во ноември истата годидна СДСМ И ДУИ експресно го отфрлија предлогот на ВМРО ДПМНЕ за укинување на Пржинската влада.
Ова е трета техничка влада од 2016 година наваму. Премиер на техничката влада во 2016 година беше Емил Димитриев, а во 2020 година беше Оливер Спасовски.
Паула Костадиноска
