Има учебници, нема учебници. Нова програма, стара програма. Настава дома, настава во училница. Четиригоришните експерименти со матурнатите кулминираа со полагањето на завршниот испит.
Учениците не се виновни за пробиениот тест, туку системот кој потрфрли во нивното образование и воспитание, сметаат психолозите. Според нив, децата се се само огледало на возрасните.
„Тие деца се огледало какви сме ние. Пораката на „Вибер“ морал да ја пуштил некој кој имал достап до тие тестови. Значи можеби некој си го пуштил на своето дете или својот роднина и потоа тоа се раширило. Затоа што колку деца имаа пристап до матурските тестови, уште решени да бидат. Значи нешто таму подлабоко се случува. Сега ние го гледаме тоа што се случува со децата и се вознемируваме, ама би требало малце да поткопаме подлабоко за да видиме како целиот систем функционира“, вели Мирјана Јовановска Стојановска вонреден професор на МИТ Универзитетот.
Психолозите сметаат дека корупцијата, непотизмот и клиентелизмот кои владеат со државата влијаат и на најмладите кои веќе не се борат за знаење туку само за оценка и го бараат полесниот пат. Тие знаат дека на крајот за вработување повеќе ќе им требаат врски отколку квалификации па затоа и не се трудат многу.
„Ако ние постојано во политиката и во општеството имаме примери, дека некој може нешто туѓо да напише како свое, дека тоа не е никаков проблем, дека може низ мала врата, или задна врата или било која врата, да помине, а не таму каде што треба, ако може да си фатиме врски, па да си поминеме полесно и на доктор и за вработување и за било кој шалтер, децата го учат тоа од нас“, вели Стојановска.
На македонското образование му е потребна коренита реформа на сите нивоа, сметаат познавачите, зашто без квалитетни кадри кои ќе излегуваат од ученичките и студентските клупи не може да има напредок за државата.
Љубиша Владимиров
