Крај на опасната забава во дивиот парк кај салата „Борис Трајковски„. Полиција, пазарни и градежни инспектори, како и инспектори од УЈП синоќа упаднаа во паркот за да проверат како една мала фирма од Чаир, без никаква дозвола и безбедносни стандарди поставила ризичен рингишпил. Направени се записници од консатираните прекршоци, а поведена е постапка за затворање на паркот и отстранување на опасните реквизити, меѓу кои е и панорамско тркало.
„Единицата за економски и компјутерски криминал при СВР Скопје во координација со службени лица од Државниот пазарен инспекторат, Управата за јавни приходи и градежен инспектор од Општина Карпош излезе на лице место и презема конкретни соодветни мерки и активности од делокругот на својата надлежност и овластувања. Имено, од страна на инспекциските служби по преземените мерки и активности и констатираната фактичка состојба изготвени се записници за констатирана состојба додека од страна на овластен градежен инспектор од општина Карпош поведена е постапка за констатираните неправилности, по што ке бидат преземени конкретни мерки во насока на отстранување на истите, престанување со вршење на активноста, како и дислоцирање на реквизитите“, соопштија од МВР.
Екипата на Алфа беше на терен. Во моментот паркот не работеше, дел од реквизитите беа ставени на камиони, но не беше јасно дали се подготвуваат да ги дислоцираат или да ги местат од почеток. Работниците кои ги затекваме на лице место не сакаа да коментираат ништо. Ни рекоа дека организаторот на забавниот парк не бил тука и дека наводно средувал документи на царина. Претходно за дел од медиумите се правдаа дека реквизитите им се нови и дека ги имаат сите потребни сертификати и лиценци за работа.
Инаку акцијата следи откако од град Скопје алармираа дека насилно се мести панорамско тркало во Карпош од фирма која била регистрирана само пред еден месец и додадоа дека не станува збор само за документација поврзана со производството на реквизитите, туку и стручноста на оние кои ги монтираат.
Љубиша Владимиров
