И по 23 години од кобниот ден, штипјани достојно се присетуваат на храброста и пожртвуваноста на двајцата свои сограѓани, бранителите Влатко Петров и Димитар Двојаковски, кои животите ги загубија кај Ваксинце, во конфликтот во 2001година. Болката се уште е пресна и по толку години раните не заздравуват, објаснува Васе Јовевски, од Здружението „Влатко Петров„
- „Тешко е да се опишат чувствата за денешниот ден. Влатко ми беше сосесд . И по толку години болката се уште е свежа и не минува„ изјави Васе Јовевски, од Здружението на граѓани „Влатко Петров„.
Според кажувањата, кобното утро Влатко Петров и Димитар Двојаковски, биле дел од групата составена од седум војници кои со транспортер се враќале од терен. Иако имало барикади кај Ваксинце, добиле наредба да продолжат. Влегувајќи во селото, во заседа од УЧК, биле нападнати од сите страни.
- „Кога ја поминале првата барикада веднаш се нашле во заседа. Се нашле сардисани од сите страни, без можност за борба. Поразителен е фактот дека сите биле убиени . Познато за тој напад е што соодносот на војниците наспроти терористите бил 1 спрема 10, односно биле нападнати од околу шеесетина„ рече Драгица Петрова, советник.
Димитар Двојаковски е роден на 22 април 1972 во Нова Горица, а Влатко Петров 23јули 1977, во штипското село Чардаклија. Семејството на Петров се подготвуваше за неговата свадба, а Двојаковски позади себе остави сопруга и едногодишен син.
Александра Ристевска
