На пладне, пред шалтерите на МВР за вадење лични документи е растеретено од гужва.
Граѓаните брзаат да си ги подигнат новите пасоши што им се издадени, а доаѓаат и на преместените термини за кои добиле повик. Дел од нив гневни заради хаосот во кој власта ги донесе и сега се заглавени, па мора да ги откажуваат патувањата поради старите пасоши. Но речиси сите се согласни дека е потребно продолжување на рокот на важноста на пасошите по теркот како со личните карти и возачките дозволи.
Ако владејачкото мнозинство не ги изгласа измените, околу 650.000 граѓани нема да знаат дали ќе може да летуваат и неизвесно е кога ќе ги имаат „северните“ пасоши во рака.
Во меѓувреме, министерот за внатрешни Панче Тошковски прави напори за да се изготвуваат 75.000 пасоши месечно со што агонијата би завршила за неколку месеци. Тој во интервју за МИА најави дека министерството ќе произведува 3300 пасоши на ден, а административците ќе работат со полна пареа, за да нема застој. Печатењето на пасоши нема да застане поради изборниот период туку ќе продолжи во континуитет, вели министерот.
„Сега да не се правиме ние дека сме не знам што, но, сето она време кое што можам да го дадам за да подобриме нешто во процесот во наредниот период којшто ни останува, 70 и некој ден до избори, па и она време по избори, ќе го дадам. Овој процес нема да застане. Некаде од прилика бројката која што во континуитет ја имале како бројка за пешатење во МВР е околу 50.000 пасоши на месечно ниво. Бројката која што сакаме да ја достигнеме, реална бројка, е некаде околу 75.000 пасоши на месечно ниво“, вели Тошковски.
Претходното раководство во МВР од СДСМ и ДУИ направи вистински хаос пред шалтерите на МВР откако граѓаните побрзаа да го фатат рокот до 12 февруари и да извадат валидни докуементи со новото име. За личните карти и возачките дозволи власта најде решение и го продолжи рокот за важност до крајот на годината. Во однос на пасошите, Грција е единствената земја членка на ЕУ која дала мислење дека не ги прифаќа патните исправи со името Република Македонија. Според последните информации, со старите пасоши ќе може да се патува во Хрватска, Босна и Херцеговина, Србија, Косово и Албанија.
