Конечно ќе се одблокира процесот за полагање на лиценци за негователки и воспитувачки. Над 900 кандидати речиси четири години чекат да бидат повикани и да се стекнат со ваква дозвола за работа во градинките. Причина за хаосот е неажурноста и незаинтересираноста во изминатиот период. Иако договорот со операторот којшто го врши лиценцирањето завршил, не е распишан нов повик за избор на нов, изјави министерот за труд и социјална политика Ѓоко Велковски при денешната посета во Штип.
„Се заглавени во еден процес на Министерството каде што нема избрано фирма која што ќе го прави ова лиценцирање и за жал, за тоа прашање никој не се заинтересирал наназад овие месеци. Овие луѓе од прилика над 900 вакви случаи од 2020 до 2023 се уште за жал чекат да бидат повикани и да се стекнат со лиценца за да може да влезат во еден процес на огласи и слично во самите детски градинки кај што ќе бидат распишани. Така што, ќе најдеме решение многу брзо„ изјави Ѓоко Велковски, министер за труд и социјална политика.
Во изминатиот период не е водено грижа за пополнување на испразнетите места, па поради тоа има огромен недостаток од стручен и технички кадар во градинките, потенцираше Велковки. Според него ваква е ситуацијата во целата држава. На Штип му недостигаат околу шеесетина , од кои повеќе од половина се негователки и воспитувачки. Ова директно влијае врз воспитно-згрижувачкиот процес. Поради немањето на кадар, добар дел од децата не можат да се згрижат и се одбивани од градинка.
„Жалосно е што две години буквално молевме за најмладите генерации да го имаат основното право за воспитно-згрижувачки процес. Навистина се срамам да живеам во ваква држава во која ссе молиме да функционираме согласно законот„ изјави Иван Јорданов, градоначалник на Штип..
Министерот Велковски најави и решение за проблемот со струшките воспитувачки. Очекуват Министерството за финансии да даде согласност и конечно се реши нивниот статус со што ќе заврши и долгогодишната голгота со која се соочувале вработените.
