Евтина тарифа, но и нови пресметки кои некои сметки ќе ги направат поскапи. Првиот работен ден во 2024 година конечно ја донесе евтината тарифа за граѓаните кои ако сакаат да штедат ќе мора да внимаваат кога готват, пеглаат, пуштат машини за перење.. Од ЕВН за Алфа велат дека со читањето на броилата од последната група, биле сетирани сите струјомери, освен оние до кои немале пристап како затворени објекти.
Екипите на електродистрибуција согласно претходно утврден план, во текот на целиот месец работеа на сетирање на броилата на дневна евтина тарифа . Сите броила се сетирани освен непристапните кои се наоѓаат во затворени објекти, викендици и слично. Тие ќе се сетираат во наредниот период и во првата дадена прилика, велат од ЕВН .
Од први јануари , струјомерите ги бројат потрошените киловати по новите цени. Оние што се во прв блок треба да плаќаат поевтино за 5,16 проценти, во втор блок цената е иста, а во третиот и четвртиот блок повторно има покачување. ( тука телоп )
ТЕЛОП – Цени по блокови
1 блок стара цена 6,8 – нова цена 6,5
2 блок стара цена 7,5 – нова цена 7,5
3 блок стара цена 8,9 – нова цена 9,2
4 блок стара цена 19,3 – нова цена 19,6
Овие цени се збир од цената на електричната енергија плус мрежарината, а сметките за струја имаат нова ставка „ пренос за мрежа “ која ќе чини 200 денари и ќе ја плаќаат сите за да имало фер распределба на трошоците на оние кои редовно трошат струја и оние кои имаат празни станови. Власта уверува дека ќе има поевтина струја, но граѓаните сепак не се сигурнио во тоа и стравуваат дека поштарот во февруари сепак ќе им донесе повисоки сметки.
Дневната евтина тарифа беше воведена од 1-ви декември , ама не можеа сите веднаш да ја користат поради долготрајноста на сетирањето на броилата кое се одвиваше во четири фази.
Околу 80 проценти од домаќинствата се во првиот и во вториот блок на потрошувачи, но нема бројка колку домаќинства точно се во прв, а колку во втор блок. Но, многу лесно домаќинствата, особено оние кои се греат на струја можат од вториот да преминат во третиот каде цената е повисока. Во ноември во споредба со октомври, 10 илјади домаќинства од првиот и вториот блок преминале во трет блок.
