За два месеци клуч на врата во четири текстилни компании во Штип, поради што 130работници во пресрет на новогодишните празници останаа без работа. Причина за затварањето е немањето на налози, а странските партнери поради евтината работна сила, своето производство го префрлиле на Блискиот Исток. Најголем дел од работниците потпишале спогодба, а само осум работнички не потпишале ништо. За нив се води постапка за да остварат право на испратнина согласно нивниот работен стаж.
- „Само во едната компанија, скоро 80%потпишаа спогодба, за останатите ние ја следиме постапката и ќе бараме да се исплати испратнина и се она што им следува на работниците, односно К-15, плата, деновите од годишниот одмор. Треба се да биде чисто за тие да си поднесат ликвидација или стечај„ изјави Кристина Ампева од здружението Гласен текстилец.
Според Ампева, состојбата во текстилната гранка во моментот не е загрижувачка и засега нема најави за затварање на други конфекции во Штип или регионот. Сепак лон производството во неизвестност ги држи не само работниците, туку и работодавачите
- „За жал повторно ќе речам, ете го тоа лон производство од кое зависиме како држава и за жал брендовите заминуваат поради стареење на работната рака и бараат постабилен пазар„ изјави Ампева
За среќа работниците во соработка со здружението и инспекторите успеале да ги добијат заостанатите платите, а дел од нив веќе нашле и работа. Од Гласен текстилец апелираат до работниците при затварање на компаниите од деловни причини, да не потпишуват никакви документи и веднаш да алармираат доколку добијат дојава за затварање на нови конфекции.
Александра Ристовска
