Се уште нема одлука, каде ќе се дислоцираат над 500 тони токсичен отпад од скопското село Орман. По две недели откако општиснки инспектор ја открил депонијата и пријавил во Министерството за животна средина, на терен конечно излегоа од државниот инспекторат. Тие, заедно со акредитирана лабараторија земаа примероци од материјата за која велат дека е олово од уништени акумулатори.
- „Во моментот во Македонија нема инсталација која што може да врши третман на ваквиот отпад. Имаме две инсталации со А интегрирана дозвола, една е во Пробиштип и една е овде, во Чучер Сандево. Тие имаат дозвола отпадот при рециклирањето соодветно да го складираат и потоа да го предадат на овластена фирма.“ – Појасни директорот на државен инспекторат за животна средина, Сретен Стојковски.
По земените примероци, инспекторите се упатија во компанијата која работи на 2,5 километри од местото. Се утврдува дали фирмата „Рецикл-Еко Старт“ е одговорна за складирање на стотици тони опасен отпад. Според информациите, сопственикот на земјиштето не е поврзан со фирмата и не знаел што се складира на неговиот имот.
Според градоначалникот на Ѓорче Петров, проблем ќе биде како и каде понатаму ќе се складира отпадот.
- „Проблем е каде ќе се исчисти тој отпад, бидејќи ние во Македонија депонија за таков тип на отпад немаме. Немаме депонија со А-интегрирана дозвола и претпоставувам дека таква депонија треба да се најде некаде во соседството. Еве ме информираа дека во Велес има милиони тони таков отпад којшто стои на отворено претпоставувам од истата причина и тука се усложнува целата работа“, вели Градоначалникот Стојковски.
Мештаните со кои разговаравме се загрижени. Велат, тука постојано се создаваат нови депонии, а на Скопје му се заканува еколошка катастрофа.
Државните инспектори на 18 октомври издале решение сопствениците на земјиштето да го дислоцираат опасниот отпад. Тече рокот од 30 дена. Доколку се утврди одговорност на фирмата „Рецикл-Еко Старт“ може да биде задолжена да го врати назад на своја локација од каде е направен или пак да направи извоз на отпадот. Ако загадувањето со опасен отпад е од големи размери, може да се отвори кривична постапка. Казните за фирмата можат да бидат максимум до 98.000 евра во зависност од големината на компанијата.
Никола Цветкоски
