Точно во 06:00 часот утринава радијаторите на скопјани беа топли, ама се изладија пред 10:00 часот, поради поволните временски услови. Грејната сезона, односно испорака на топлинска енергија за корисниците на парно почна точно на време, велат од ЕСМ. Ама пропаднаа ветувањата дека цевките на мостот „Беласица“ кој беше опожарен во мај, ќе бидат поставени на време, односно пред почетокот на грејната сезона. Па така останува отворено прашањето дали цената на парното ќе остане иста, или пак ќе порасне за одредена сума.
- Доколку надворешните дневни температури после 15 часот се под 15 степени се започнува со испорака на топлинска енергија, односно централното греење повторно се вклучува. Повторно апелираме до потрошувачите и „Управителите” односно “Заедниците на сопственици” да ги отстранат дефектите на внатрешната грејна инсталација во најкус можен рок и истото веднаш да го пријават во Центарот за грижа за потрошувачи, да овозможат непречен пристап на екипите на компанијата до топлинската станица, како и да обезбедат постојано напојување на топлинската станица со електрична енергија (платени сметки), велат од „ЕСМ“.
И додека граѓаните се во грч дали наскоро ќе добијат нови повисоки сметки за парно, на терен, околу опожарениот мост „Беласица“ нема никакви активности. Цевките се оставени под мостот веќе трет месец, а местото не е ниту расчистено, ниту пак санирано од изгорените остатоци. Па така пропадна уште едно ветување на премиерот кој пред 3 недели рече дека цевките на мостот ќе бидат поставени на време.
Паралено, од РКЕ велат дека снабдувачот е должен од 06:00 до 22:00 часот да обезбеди топлина од 20+1 степен целзиусов. Синоптичарите велат дека временските услови ќе бидат поволни, но не за долго. Заладување не очекува уште ноќеска.
- Времето денеска ќе биде умерено облачно и до крајот на денот ќе залади. Во текот на ноќта кон понеделник, информираат од УХМР, под влијание на продор на студена воздушна маса од север ќе почне да дува засилен северен ветер, што во првите два дена од работната седмица ќе услови значително намалување на дневната температура за повеќе од десет степени.
Претходно, првиот човек на Регулаторна Марко Бислимовски, рече дека цената на топлинската енергија останува иста, а нова одлука ќе биде донесена откако цевководот на мостот „Беласица“ ќе биде поставен. До тогаш, ќе се користи алтернативниот вод на железничкиот мост.
Грејната сезона ќе трае до 15 април, со можност за продолжување уште две недели, во зависност од температурата. Во моментов на топловодната мрежа на „ЕСМ“ се приклучени 63.000 потрошувачи на парно греење.
Борис Грујоски
