Улицата пред Републичката изборна комисија (РИК) на Србија, наспроти која се наоѓа и Претседателството, сè уште е затворена. Полициските сили поставија барикади и заштитни огради на улицата по која подоцна, по затворањето на гласачките места во 20 часот, ќе бидат транспортирани гласачките ливчиња од предвремените парламентарни избори и доставени до РИК за броење.
За сообраќај, но и за пешаци, е затворен дел од булеварот од крстосницата кај локацијата позната како „Лондон“ кон Теразије, а трасите на јавниот превоз се изменети на потегот од Славија кон Теразије.
Бројни новинарски екипи, се обидуваат да стасаат до РИК, но најголемиот дел од нив не успеаја да поминат низ барикадите.
На новинарско прашање од некои од колегите кои по неколкучасовно чекање успеаја да влезат во РИК, зошто е затворен пристапот до Комисијата, претседателот на РИК Владимир Димитријевиќ изјави дека не знае зошто е тоа така и оти тоа е во надлежност на Министерството за внатрешни работи.
Во Паркот на пионери во центарот на Белград, познат како „Ќациленд“, неколку часа пред затворањето на гласачките места на вонредните парламентарни избори, повторно почнаа да се поставуваат шатори и друга инфраструктура. Очевидци велат дека паркот цела ноќ се полнел и со полиција.
Во меѓувреме, сопствениците на продавниците на улицата „Крал Милан“, во близина на РИК и Претседателството, поставија заштитни дрвени блокови на своите излози.
Мерките за безбедност во центарот на Белград ќе траат сè додека гласачките ливчиња не стигнат до РИК.
