Европа треба да биде поблиску до нашите граѓани, не само преку ветувања, туку преку конкретни резултати, порача вицепремиерот и министер за европски прашања Беким Сали по средбата со европската комесарка за проширување Марта Кос во Брисел.
На средбата, како што информира Сали, се разговарало за европската иднина на Македонија и можностите што ги отвора новиот пристап на Европската Унија кон проширувањето.
– За нас, постепената интеграција е можност реформите да се претворат во видливи придобивки: поевтини плаќања преку SEPA, подобра дигитална поврзаност, нови можности за бизнисите и приближување кон европските програми, вели Сали.
Тој посочи дека Македонија останува посветена на реформите и очекува тоа соодветно да биде вреднувано.
– Истовремено, веруваме дека напредокот треба да се вреднува според заслугите и да биде проследен со конкретни чекори кон членството, порача вицепремиерот.
Сали изрази задоволство што комесарката Кос ималс можност директно да комуницира со македонските медиуми, преку интервју посветено на европската перспектива.
– Европската интеграција треба да биде процес што граѓаните го гледаат, го чувствуваат и од кој имаат придобивки, истакна Сали по разговорите со Кос.
На средбата биле разгледани и Планот за раст и евроинтегративниот процес на земјава.
Сали престојува во тридневна посета на Брисел, во чии рамки остварува средби со претставници на европските институции посветени на евроинтеграциите и продлабочувањето на соработката со Европската Унија.
