– По објавите во дел од медиумите дека во средата на 7 октомври, на подрачјето на Скопје, две лица биле физички нападнати од полициски службеници при нивното постапување, при што, според нивните наводи, им бил оштетен и автомобилот, министерот за внатрешни работи Панче Тошковски му наложил на Одделот за внатрешна контрола, криминалистички истраги и професионални стандарди да го испита случајот.
– Одделот презема мерки и активности за целосно утврдување на фактичката состојба и околностите на настанот, како и за утврдување на евентуална одговорност на инволвираните полициски службеници – информираат од МВР.
По утврдувањето на фактичката состојба ќе бидат преземени соодветни мерки согласно законските прописи, а јавноста ќе биде навремено известена.
ДУИ денеска побара оставка од заменик-министерот за внатрешни работи, Астрит Исени и целосно расветлување на овој случај во кој двајцата млади на возраст од 21 и 23 години, како што велат од партијата, според нивните изјави, биле брутално малтретирани од полицијата.
