Педесет ученици од основни училишта од Чаир бесплатно ќе посетуваат едукативни програми насочени кон науката и развојот на личните способности и поттикнувањето на нивниот потенцијал, за што е потпишан меморандум за соработка помеѓу Општина Чаир и Центарот SkyLab.
-Во рамки на оваа соработка, учениците ќе имаат можност да ги посетуваат курсевите SKYLAB НАУКА и SKYMIND, каде што преку практични експерименти и современи методи на учење ќе ги прошируваат своите научни знаења, ќе ги развиваат способностите за концентрација, управување со емоциите и самодовербата, соопшти Општина Чаир.
Градоначалникот Изет Меџити изјави дека со овој меморандум исполнуваат ветување од нивната програма.
-Од училишните клупи до експериментите, откритијата и новите идеи! Со овој меморандум исполнуваме уште едно ветување од нашата програма, овозможувајќи им на 50 ученици од Чаир бесплатно да посетуваат програми кои ја поврзуваат науката со личниот развој. Чаир има талентирани деца, со љубопитност и исклучителен потенцијал. Наша задача е да им создадеме можности да го развиваат својот талент, да ги прошируваат знаењата и да ја градат својата иднина со поголема самодоверба. Токму тоа го правиме, изјави Меџити.
Општината Чаир во соопштението наведува дека оваа соработка претставува „уште еден чекор кон проширување на образовните можности за учениците од Чаир, поттикнувајќи го учењето преку практично искуство и развојот на способности кои придонесуваат за нивниот интелектуален, емоционален и социјален развој“.
