Во штипското Основно јавно обвинителство, со работа започна Истражниот центар. Негова задача е да ја зголеми ефикасноста на обвинителите и да ја забрза постапката, особено во предметите поврзани со финансиски и економски криминал. Штипските истражители формално со работа веќе започнаа и постапуваат по првите предмети.
„Праксата покажува дека истражните центри стануваат вистински јадра на истражната дејност на обвинителствата каде што тие функционираат. Директна, континуирана комуникација меѓу јавните обвинители и истражителите во моментите кога постапуваат по предметите и прибавуваат докази, значајно ја олеснува работата на јавните обвинителства. Истражните центри овозможуваат олеснето водење на финансиски истраги“, изјави државниот јавен обвинител, Ненад Савески.
Во моментот, кадарот во штипскиот Центар се доекипира. Според систематизацијата, потребни се вработувања на уште истражители, објаснува раководителката на центарот, Тања Кацарова, која ги охрабри припадниците на правосудната полиција кои имаат способности за дигитална форензика и друг вид на криминалитет да се пријават на објавените огласи.
„Во Истражниот центар при Основното обвинителство Штип, треба да има вкупно четири истражители. На распишаниот оглас од страна на ЈО се јавија двајца истражители коишто ги поминаа потребните подготовки и беа избрани да бидат истражители во овој центар“, изјави раководителката на Истражниот центар, Тања Кацарова.
Освен во Штип, вакви центри има уште во пет градови низ државата. Истражниот центар во ОЈО Скопје во периодот од јануари до август презеде вкупно 7.356 дејствија, при што се постапувало по 2.325 предмети.
