Наодите од истражувањето „Родот во медиумите 2025: Родовите прашања и начинот на претставување на жените и мажите во медиумската кампања за локалните избори во 2025 година“ – било во фокусот на денешниот трет јавен состанок за оваа година на Агенцијата за аудио и аудиовизуелните медиумски услуги (АВМУ).
На состанокот се разговарало за активностите поврзани со спроведените надзори врз радиодифузерите, операторите на јавни електронски комуникациски мрежи, издавачите на печатени медиуми, издавачите на онлајн-медиуми – интернет-портали, изречените мерки јавна опомена, изработените анализи и студии, активностите на полето на меѓународната соработка и европската интеграција.
– На состанокот беа презентирани и наодите од истражувањето „Родот во медиумите 2025: Родовите прашања и начинот на претставување на жените и мажите во медиумската кампања за локалните избори во 2025 година“, кое за потребите на АВМУ го изработи маркетинг-агенцијата „Маркет вижн“. Анализата на изборното известување во централните дневници на МРТ 1 и МРТ 2, како и на платеното политичко рекламирање во форма на спотови со сценарио и спотови со снимки од партиски настани кај националните комерцијални телевизии „Алсат-М“, „Алфа“, „Канал 5“, „Сител“ и „Телма“, покажа дека жените и мажите не беа еднакво застапени во улогите на носител(к)и на политичките пораки – стои во соопштението на АВМУ.
Во сите анализирани потпримероци, како што стои во анализата, мажите доминираат меѓу примарните субјекти, односно лицата што имаа централна улога во политичката комуникација.
– Од вкупно 791 регистрирано појавување на примарни субјекти во изборните прилози на јавниот сервис, жените учествуваа со 103 појавувања (13 отсто), а мажите со 688 појавувања (87 отсто). Слична родова нерамнотежа беше регистрирана и во ППР-спотовите на комерцијалните телевизии. Од вкупно 588 појавувања на примарни субјекти, 64 беа жени (10,9 проценти), а 524 мажи (89,1 отсто) – наведуваат од АВМУ.
Најизразена нерамнотежа кај комерцијалните телевизии била забележана во ППР-спотовите со снимки од партиски настани, каде што од вкупно 44 регистрирани појавувања на примарни субјекти немаше ниту едно појавување на жена.
Кај ППР-спотовите со сценарио жените учествувале со 64 од вкупно 544 појавувања (11,8 проценти), што укажува на нивна значително помала застапеност и во овој тип политичко рекламирање.
– Родовата небалансираност беше особено изразена кај најекспонираните политички улоги, особено кај кандидат(к)ите за градоначалници/чки и партиските лидер(к)и, а кај кандидат(к)ите за советници/чки застапеноста беше побалансирана. Истовремено, анализата не идентификува случаи на сексуална објективизација или експлицитна родова дискриминација – се наведува во соопштението на АВМУ по третиот јавен состанок одржан оваа година.
