Нови програми, модерни технологии, инвестиции во инфраструктура, поддршка и мотивација на наставниот кадар. Македонскиот образовен систем е пред процес на промени кои треба да донесат не само поквалитетен туку и помодерен систем на образование. Предизвикот според надлежните е сериозен, но стратегијата велат е јасна. Министерката за образование која на стартот на новата учебна година се соочи со критики за дел од потезите нагласува дека сложеноста на проблемите бара мерки кои ќе ги опфатат сите страни од школувањето.
„Оваа влада презема мерки ние како министерство, првенствено она што го направивме, воведуваме обуки за наставниците затоа што континуирано и доживотно учење на сите па и на наставниците како да го подобрат овој предизвик кој се испречува пред сите нас. Како да го подобрат читањето со разбирање. Како да се подобриме во математика и природни науки, ги сменивме наставните програми, ги прилагодуваме на модерните европски програми… Мерките ги преземаме но јас велам дека не можеме од денес до утре да ги чекаме резултатите. Резултатите од ова што денес го работиме во образованието ќе дојдат најрано по 5-6 години а оптимално по 9 до 10 години“, изјави Весна Јаневска, министер за образование и наука
Во однос на одлуката за затворање на училишта во повеќе општини, министерката истакнува дека тоа се неопходни чекори за подобрување на средината во која учениците се образуваат. Во таа насока се и мерките, односно инвестициите во дигитализацијата која исто така е предизвик. Дел од училипштата како во скопски Аеродром веќе почнаа да ги добиваат таблетите за модерни училници, но и нови бесплатни униформи. Ова според надлежните е многу значајно во услови кога модерните технологии забрзано се менуваат, а со тоа и начинот на кој се разменуваат и информациите. Реформите имаат за цел да ја промовираат и еднаквоста помеѓу децата кои доаѓаат од различни социјални позадини.
„Ова што го правиме со доделувањето на таблети е во правец на модернизација на визуелизација на она што децата треба да го научат за полесно да го научат, бидејќи овие времиња тие користат визуелно учење. Но тоа не значи дека тие не треба да ја развиваат моториката нели да пишуваат да читаат да сметаат и рачно да работат.“
Во целиот процес не се запоставени ниту наставниците. До март следна година се планира ново зголемување на нивните плати, кое би продолжило и понатаму на годишно ниво согласно договорите кои се постигнати со синдикатот.
