Еко-машини и алатки за одржување од денеска ќе се користат во Градскиот парк во Кавадарци за косење трева, кастрење на гранки и други активности во паркот, што важи за еден од најубавите во државата. На промоцијата на новите алатки и машини, беше кажано дека се набавени од страна на Јавното претпријатие „Комуналец“, со цел почиста животна средина и помалку бучава.
– Започнуваме со овие алатки што се на батерии. Целосно еколошки пристап кон работните ангажмани и работните активности во самиот градски парк, така да веќе овој прекрасен парк што се наоѓа на територијата на град Кавадарци, целосно ќе добие и едно еколошко знаме. Ќе бидеме препознатливи и по екологијата. Оние алатки што претходно беа на бензин, правеа загадување, беа премногу бучни. Сега ги заменуваме со нови електрични алатки што се бесшумни да речеме со дел на работењето и целосно екологијата на едно повисоко ниво во самиот Градски парк ќе биде достапна – изјави Гоце Ангеловски, директор на „Комуналец“.
Тој информираше дека целосната посветеност кон зачувувањето на екологијата во паркот, значи и забранет влез за возила, освен во случаи кога тоа е неопходно.
Претседателот на Совет на Општината, Стојанче Рамов потсети дека станува збор за квадратура од 80.000 метри квадратни, од кои 65.000 метри квадратни се дрвја, 15.000 метри квадратни е трева.
– Веќе имаме еко-градски парк, има комплетна замена на одржувањето на самиот Градски парк во однос на бензини, во однос на сите уреди и алатки на бензин, одиме на електрификација со нови методи, со батерија, за да воведеме една нова еко-компонента, затоа што и придвижувањето кон модерниот свет е замена на тие фосилни стари горива со батерии, заради зачувување на самата животна средина – нагласи Рамов.
Тој подвлече дека во изминатите осум години, прилично се вложи во овој парк. Притоа се осврна на одржувањето на зелените површини и подигнувањето на нови парковски содржини.
-Тоа што ни останува, да го следиме трендот на новото време, е овие фосилни горива – бензин и нафта, да ги замениме со батерии, односно електрификација. Во тој план ќе продолжиме и во идно време – додаде Рамов.
Патем, потсети дека планираат во јавниот превоз да вклучат и три нови електрични автобуси, наредната година.
Тој ги спомена и најавената електрификација на такси возила, како и изградбата на неколку станици за полнење на електрични возила.
