Амбасадорскиот совет е можност за директна и суштинска размена на ставови за европската и евроатлантската агенда, безбедносните предизвици, економската дипломатија и натамошното унапредување на работата на дипломатската мрежа. Целта е јасна – модерна, активна и стратешки координирана дипломатија која ги штити националните интереси, отвора нови можности за државата и им служи на граѓаните, напиша министерот за надворешни работи и надворешна трговија, Тимчо Муцунски на својот фејсбук профил.
Како што наведува, за државните и стратешките интереси неопходни се институционална координација, јасни позиции и сериозен државен пристап.
-Денеска, во рамките на Амбасадорскиот совет, пред шефовите на дипломатско-конзуларните претставништва свои обраќања имаат претседателката на државата, Гордана Сиљановска-Давкова, и претседателот на Владата, Христијан Мицкоски. Нивното учество ја потврдува важноста на заедничкиот институционален пристап кон клучните државни приоритети, истакнува министерот.
Муцунски денеска во Скопје се обрати на отворањето на амбасадорскиот совет, на кој присуствуваа шефовите на дипломатско-конзуларните претставништва на државата.
