Општина Делчево повторно е оценета со високо ниво на буџетска транспарентност, согласно најновата анализа на Центарот за економски анализи (ЦЕА).
Од Општината посочуваат дека оценката претставува потврда за транспарентното работење и овозможувањето на граѓаните да имаат пристап до информации поврзани со општинскиот буџет, неговото планирање и реализација, како и начинот на користење на јавните средства.
Градоначалникот на Делчево, Иван Гоцевски, во објава на социјалните мрежи истакнува дека транспарентноста треба да биде составен дел од одговорното управување со Општината.
-Транспарентноста не ја разбираме само како обврска, туку како одговорност кон секој граѓанин. Секој ден работиме јавните средства да бидат управувани одговорно, а граѓаните да имаат јасна и навремена информација каде и како се трошат нивните средства“, наведува Гоцевски.
Тој додава дека високата буџетска транспарентност е признание, но и обврска за продолжување на политиките на отвореност и отчетност.
Според Гоцевски, оценката на ЦЕА е уште една потврда дека отвореноста на локалната самоуправа кон граѓаните е важна основа за градење доверба, одговорно управување и нивно активно учество во креирањето на локалните политики.
Од Општина Делчево посочуваат дека и во иднина ќе продолжат со обезбедување навремени и достапни информации за работата на локалната самоуправа и управувањето со јавните средства.
