Пожар изутрината избувна на депонијата „Буково“ во Охрид, на дел што подолго време не се одлага комунален отпад.
Како што информираат од ЈП „Охридски Комуналец“, екипи на претпријатието заедно со припадници на Територијалната противпожарна единица од Охрид се на терен и работат на локализирање на пожарот. Се врши пресек и создавање заштитна линија со цел да се спречи неговото понатамошно ширење.
Од ЈП „Охридски Комуналец“ велат дека состојбата континуирано се следи, а екипите ќе останат на терен додека е потребно за пожарот целосно да се стави под контрола.
Во однос на причините за избувнувањето, засега не се исклучува можноста пожарот да е намерно подметнат. Причината ќе биде утврдена од надлежните институции по спроведување на соодветна постапка.
Од претпријатието информираат дека оваа година на депонијата „Буково“ се однесени и депонирани над осум илјади метри кубни земја за прекривање и стабилизирање на делови од депонијата, како и за намалување на можноста за појава и ширење пожари.
