Почна првиот уписен рок на студенти во прва година на Универзитетот „Гоце Делчев“ (УГД) во Штип за академската 2026/2027 година. Уписот трае до 21 август, а кандидатите имаат можност да изберат една од 47 акредитирани студиски програми на 12 факултети и три академии.
За новата академска година на УГД се предвидени вкупно 3.341 слободно место. Од нив, 1.629 се наменети за редовни студенти, додека останатите места се за вонредни студенти и студенти со кофинансирање.
Проректорот за настава на УГД, Сашо Коцевски, информира дека во изминатите денови до Универзитетот пристигнале околу 1.000 електронски пријави.
-Согласно конкурсот за академската 2026-2027 година, имаме вкупно 3.341 слободно место, од коишто 1.629 припаѓаат на квотата на редовни студенти, а останатите се резервирани за студентите коишто ќе студираат вонредно и за оние со кофинансирање. Она што би сакал да го порачам и да им го појаснам на нашите идни студенти, на кандидатите кои што аплицираат на Универзитетот „Гоце Делчев“ во Штип, е дека самиот процес на аплицирање се одвива во две фази. Имено, прво тие поднесуваат електронска апликација преку нашиот систем за електронски уписи, а потоа во вториот чекор ги носат своите документи во физичка форма и ги доставуваат на едно од уписните места на универзитетот коишто се лоцирани во Штип на Правниот факултет, имаме уписно место во Струмица, во Гевгелија, во Кавадарци и во Скопје-вели Коцевски.
Тој истакна дека стандардно, најмногу интерес има за запишување на Факултетот за медицински науки.
– Имаме голем интерес и за општествените науки, пред сè за Економскиот и за Правниот факултет, за Факултетот за туризам и бизнис логистика итн. Но интерес имаме и за техничките науки. Тука имаме најголем интерес за Факултетот за информатика, Факултетот за природни и технички науки, Земјоделскиот. Она што би сакал исто така да го напоменам е дека сите оние кандидати коишто нема да стигнат да аплицираат од било какви причини во првиот уписен рок, Универзитетот Гоце Делчев во Штип организира и втор и трет уписен рок. Вториот уписен рок ќе биде на 3 и 4 септември, а третиот уписен рок ќе се спроведе на 16 и 17 септември-изјави Коцевски.
За овој прв уписен рок, откако кандидатите ќе ги достават во физичка форма своите документи, а тоа треба да го направат до петок, 21 август, комисијата ќе направи нивна проверка и прегледување на нивните документи. На 26 август ќе се истакнат прелиминарните резултати.
-Оние кандидати кои што сметаат дека треба да поднесат приговори, тоа може да го направат на 27 август, а на 31 август Универзитетот ќе ги објави конечните ранг-листи и ќе ги направи решенијата за прием. Самиот упис на кандидатите ќе се врши од 1 до 3 септември оваа година-подвлече Коцевски.
Проректорот за настава на УГД-Штип, Коцевски на идните студенти им порача дека во Универзитетот „Гоце Делчев“ и наставниот кадар ќе најдат вистински партнери, кои што ќе им ги отворат лабораториите и ќе им овозможат да учествуваат во квалитетни истражувања, во меѓународни проекти, ќе им дадат врвна едукација и уште повеќе ќе имаат можност да остваруваат мобилности преку Еразмус+ програмата и да се вмрежуваат со студенти и професори од осум партнерски универзитети во рамките на Европската алијанса.
