Во Охрид денеска започнува бесплатниот наставно-научен и едукативен камп, наменет за ученици од средните училишта во Скопје.
Првата смена, како што информираат од Град Скопје, составена од 115 ученици, утрово замина за Охрид, каде во текот на седумдневниот престој ќе имаат можност да стекнуваат нови знаења и вештини, да истражуваат, да развиваат интереси и да создаваат нови пријателства.
Целта на кампот е младите да го поминат летниот период на креативен и едукативен начин, преку активности што ги поттикнуваат љубопитноста, критичкото размислување, тимската работа и личниот развој.
Програмата опфаќа научно-истражувачки работилници, едукативни предавања, интерактивни дискусии, тимски проекти, културни и креативни активности, како и спорт и рекреација.
Посебен акцент ќе биде ставен на развојот на лидерските, комуникациските и презентациските вештини. Учениците ќе работат во тимови, ќе разменуваат идеи и ќе имаат можност своите замисли да ги претворат во конкретни проекти.
Покрај едукативните активности, учесниците ќе го запознаат и културното и историското наследство на Охрид, а преку дружењето со своите врсници ќе имаат можност да создадат нови пријателства и спомени.
Втората смена, исто така со 115 ученици, ќе престојува во Охрид од 25 до 31 август, со што вкупно 230 средношколци од Скопје ќе бидат опфатени со овогодишниот камп.
Преку ваквите активности се создаваат можности за квалитетно образование, развој на практични вештини и поттикнување на младите да ги препознаат и развиваат своите потенцијали.
