Министерот за односи меѓу заедниците, Агон Ферати, денеска, оствари средба со амбасадорот на Обединетото Кралство во Македонија, Метју Лосон, на која се разговараше за важноста од зајакнување на заемната соработка и унапредување на односите меѓу двете земји.
Како што соопштуваат од Министерството, значаен дел од разговорот бил посветен на прашањата поврзани со безбедноста во земјата и регионот, имајќи ја предвид важноста на стабилноста и општествената кохезија за европската перспектива на регионот.
– Во таа насока, беше истакната потребата од континуирана соработка и размена на искуства со меѓународните партнери, со цел зајакнување на институциите, меѓуетничките односи и придонесот кон регионалната безбедност и стабилност. Ферати и Лосон разговараа и за британската програма „G2G“, со посебен фокус на вклучувањето на младите и развојот на нивните вештини. Беше оценета важноста од создавање можности за младите преку програми кои ги развиваат нивните вештини во областа на претприемништвото, комуникацијата и лидерството, подготвувајќи ги за поактивна улога во економскиот и општествениот развој на земјата – стои во соопштението.
