Општина Виница информира дека доцна синоќа завршија активностите за рехабилитација на делови од улици и санација на ударните дупки на повеќе локации во градот.
Надлежните од локалната самоуправа им се извинуваат на граѓаните што реализацијата на овие активности доцнела 2-3 недели. Според нив, причината е што, како што велат, денес постапките се спроведуваат транспарентно и јавно, а изведувачите не се однапред избрани и не се знаат пред да биде распишан и завршен тендерот.
– Понекогаш може да се случи да биде избран изведувач што нема да ги почитува динамиката и роковите за изведба. Тоа е реалноста на транспарентните постапки – за разлика од времињата кога однапред се знаеше кој ќе го добие тендерот, а денес тие пишуваат очајни статуси – смета градоначалникот на општина Виница, Митко Костадиновски.
Тој потенцира дека е најважно што работата е завршена и улиците се санирани.
Инвестицијата за овој проект изнесува 1,5 милион денари, средства обезбедени од буџетот на Општина Виница.
