Можностите за продлабочување на економската соработка, со посебен фокус на следната мисија на јапонска бизнис делегација во Скопје, која е закажана за ноември, беа тема на разговор на денешната средба на директорот на Дирекцијата за ТИРЗ, Гоце Димовски со Тадаши Мураками, генерален директор на канцеларијата во Виена на Јапонската организација за надворешна трговија (JETRO), што се одржа во рамки на соработката со JETRO.
На средбата, информираат од Дирекцијата за ТИРЗ, беа разгледани можностите за претставување на инвестицискиот потенцијал на Македонија пред јапонските компании, како и за воспоставување нови контакти со компании заинтересирани за проширување на своето присуство во регионот.
Директорот Димовски ги претстави можностите што ги нудат ТИРЗ и поддршката која Дирекцијата ја обезбедува за инвеститорите, истакнувајќи ја подготвеноста за понатамошна соработка со JETRO и јапонската бизнис заедница. Тој посочи дека активно се работи на подобрување на условите за инвестирање, унапредување на инфраструктурата и создавање конкурентна деловна средина која ќе овозможи привлекување на нови инвестиции и поддршка на компаниите кои веќе работат во зоните.
Од страна на Мураками беше истакната важноста на континуираното поврзување на јапонските компании со институциите и бизнис секторот во Македонија, при што беше нагласена улогата на JETRO во создавањето нови можности за деловна соработка и размена на информации за инвестициските можности.
