Шеесет македонисти, слависти, балканолози, филолози, културолози и преведувачи од 17 земји ќе учествуваат на 59. Летна школа на Меѓународниот семинар за македонски јазик, литература и култура (МСМЈЛК) при Универзитетот „Св. Кирил и Методиј“ во Скопје, што од 20 август ќе се одржува во Конгресниот центар во Охрид.
Предвидено е на свеченото отворање на Школата пред учесниците да се обратат ректорката на УКИМ, проф. д-р Биљана Ангелова, директорката на МСМЈЛК при УКИМ, проф. д-р Кристина Николовска и министерката за образование и наука, проф. д-р Весна Јаневска.
Учесниците доаѓаат од Албанија, Аргентина, Бугарија, Италија, Јапонија, Канада, Кина, Полска, Русија, САД, Словачка, Словенија, Србија, Турција, Унгарија, Франција и Хрватска.
Програмата на Летната школа опфаќа лекторски вежби, предавања, интерактивна и амбиентална настава во стариот дел на Охрид, курс по македонски народни ора, преведувачка работилница, културно-уметничка програма, промоции и научна екскурзија.
На свеченото отворање ќе бидат доделени и наградите за македонистика. Добитник на најголемата награда „Воздејства“ годинава е проф. д-р Кристина Крамер од Канада, додека благодарници „Синергии“ ќе им бидат доделени на министерката Весна Јаневска и на Државна лотарија на СР Македонија.
Како и останатите изданија, по Летната школа ќе се одржи 53. Меѓународна научна конференција, на која ќе учествуваат 75 научни истражувачи од земјава и странство. Вкупно 135 македонисти – студенти, предавачи и научни истражувачи – ќе бидат дел од програмите посветени на македонскиот јазик, литература и култура.
Во рамки на програмата ќе бидат промовирани и шест нови зборници, меѓу кои зборниците од минатогодишната Летна школа и Меѓународната научна конференција, три зборници од преведувачката работилница посветени на Гане Тодоровски, Петре Андреевски и Анте Поповски, како и „Излишно писмо до Бога / Zbyteczny list do Boga“ со препеви на полски јазик од проф. д-р Маќеј Кавка.
Од УКИМ информираат дека во изминатите три години е зголемен бројот на лекторатите по македонски јазик во странство. Отворени се лекторати во Тирана и Нитра, а е возобновен и најстариот лекторат во Неапол, со што вкупниот број лекторати достигна 12.
