Со цел да се подобри постоечката инфраструктура во централното градско подрачје, веќе извесен период на терен се одвиваат градежни активности за реконструкција на тротоарите на улиците Маршал Тито и Партизанска. Проектот е аплициран и одобрен на јавниот повик на Владата, информираше денеска градоначалничката Марија Нацева на нејзината Фејсбук-страница.
– Станува збор за тротоари за кои стручните служби утврдија дека се во незавидна состојба и делумно нефункционални, па токму затоа се пристапи кон нивна реконструкција и обнова – се појаснува во објавата.
Се додава дека во моментов се одвива реконструкција на тротоарот на улица Маршал Тито на потегот од „Либерта“ до градскиот плоштад, како и на улица Партизанска на потегот од градскиот плоштад до спојот со улицата 4-ти јули со вкупна должина од 653 метри на обата тротоари.
– Целта на проектот е подобрување на постоечката инфраструктура на двете улици и преку изведување градежни зафати да се подобри квалитетното функционирање и да се создадат услови за непречено и олеснето движење на пешаците и лицата со посебни потреби, а истовремено да се подобри урбаниот лик на овој дел од Неготино – пишува во објавата на градоначалничката.
